DENR employees hurt in Koronadal shooting
Tatlo katao kabilang ang dalawang kawani ng DENR 12 sugatan sa pamamaril ng riding tandem sa Koronadal City.
Kinilala ng Koronadal City PNP na pinamumunuan ni Police Lt. Col Rey Egos ang mga biktima na sina Hazna Potri Sabdulla at ina nitong si Bai Mariam Sabdullah, kapuwa administrative officers ng DENR-12, kapuwa nakatira sa Purok Clemente Barangay Zone 4, Koronadal City.
Sugatan din ang tricycle driver na si Kenneth Lozada.
Ayon sa pahayag ng PNP, sakay ang mag-inang DENR employees ng tricycle pauwi sa kanilang bahay nang paputukan ng dalawang lalaking sakay ng motorsiklo.
Ang mga DENR employees ay dinala sa Dr. Arturo Pinggoy Hospital habang ang tricycle driver ay dinala sa South Cotabato provincial hospital.
Narekober ng mga pulis sa crime scene ang limang basyo ng 45 pistol.
Hindi pa batid ng mga pulis kung sino ang riding tandem na mga suspek at ano ang motibo ng mga ito sa pagbaril sa mga biktima.