Army soldier, 3 Dawlah Islamiyah slain in Lanao Sur skirmishes
COTABATO CITY - TATLONG MGA TERORISTA ang napatay habang isang sundalo rin ang nasawi sa military focused operation sa Maguing, Lanao del Sur kahapon ng madaling araw.
Ang labanan ay naganap sa Barangay Ilalag, Maguing at target ng operation ang Dawlah Islamiyah Maute terrorist group leader na si Abu Zacharia, ayon sa report mula sa tanggapan ni BARMM police regional director Brig. Gen. Arthur Cabalona.
Sa dami ng mga bandido na nagtitipon sa naturang lugar, kinailangan ng military na gumamit ng air assets nito upang bombahin ang kinaroroonan ng mga terorista.
Sa report ng 103rd Infantry Brigade, ang mga labi ng tatlong bandidong napatay ay na-recover sa encounter site.
Bukod sa isang babaeng sundalo na nasawi, sugatan din ang apat na iba pang kasamahan nito.
Naka-recover naman ang Army ng dalawang cal. 50 machinegun, isang cal. 30 machine gun, mga Armalite, AK 47 rifles at Garand rifles, mga rocket propelled grenades, 22 mga improvised bombs, mga bala at personal na gamit ng mga bandido.
Ayon kay Cabalona, nagpapatuloy pa ang military operation.
Mahigit 800 pamilya naman ang lumikas sa mga kalapit lugar sa takot na madamay. Agad na tumugon ang MSSD-BARMM at nagpadala ng emergency response team.