Mangingisda, naaresto ng Coast Guard dahil sa dynamite fishing
COTABATO CITY - KINILALA ng Inter-Agency Task Force Kutawato (IATFK) sa pamumuno ni Cotabato City Mayor Bruce Matabalao ang operator ng bangka, na si Joharto Sulaiman Dawan ng Purok 4, Mother Barangay Kalanganan sa lungsod.
Sa ulat ng IATFK, si Dawan ay naaktuhang gumagamit ng dinamita kasama ang dalawang menor de edad alas dyes ng umaga kamakalawa sa karagatang malapit sa Kalanganan 2.
Sa pagsisiyasat, natagpuan sa motorized boat ng suspek ang mga pampasabog pati na ang mga isdang hinihinalang nahuli gamit ang dinamita.
Ang operasyon ay magkatuwang na inilunsad ng Maguindanao/Cotabato Maritime Police Station at ng Philippine Coast Guard - Maguindanao.
Nahaharap ngayon ang suspek sa kasong paglabag sa section 92(b) ng Republic Act 10654 na nagbabawal sa ganitong uri ng pangingisda.
Nasa custodial facility na ng City PNP si Dawan habang nasa pangangalaga na ng DSWD ang mga menor de edad na suspek.