Isa sa mga sundalong nasawi sa Maguindanao Sur ambush, ikakasal na sana
COTABATO CITY - HINDI na matutuloy pa ang pag-iisang dibdib nina Pvt. Jessie James Corpuz at nobyang si Irith Rose Almirante matapos na masawi si Corpuz sa ambush nitong Linggo ng umaga sa Brgy. Tuayan 1, Datu Hoffer Ampatuan, Maguindanao del Sur.
Sa panayam ng DXMS Radyo Bida kay Almirante, sinabi niya na nitong Enero pa namanhikan si Corpuz sa kanyang pamilya at nangakong magpapakasal na sila sa susunod na taon.
Dalawang taon na silang magkasintahan at ni minsan ay hindi ito nagkaroon ng problema sa kanyang nobyo.
Ang dalawa ay pawang taga Cotabato City.
“Sabi niya yung GOA uniform niya yung susuotin niya sa kasal namin pero sa burol niya pala sinuot kaya ang daya daya niya,” dagdag pa ni Almirante.
“Ang sakit lang kasi last year, yung anak namin na sa sinapupunan ko ang kinuha, ngayon si James naman,” kwento pa ni Almirante sa Radyo Bida.
Hustiya naman ang sigaw nito sa sinapit ng kanyang nobyo.
Isa si Corpuz sa apat na mga sundalong nasawi sa pananambang ng local terrorist group sa Datu Hoffer nitong Linggo.
Pabalik na sana ang mga ito sa kanilang patrol base sakay ng isang multicab nang tambangan sa Brgy. Tuayan 1.