2 sundalo, 3 Dawlah Islamiyah members sugatan sa engkwentro sa MagSur
Mindanao Armed Conflict • 21:30 PM Tue Oct 17, 2023
723
By:
DXMS/NCA
NAGPAPAGALING na ngayon sa ospital ang dalawang Army Private First Class ng 40th Infantry Battalion matapos masugatan sa sagupaan ng kanilang tropa laban sa mga kasapi ng Dawlah Islamiyah Group pasado alas 8:00 ng umaga kanina.
Nangyari ang engkwentro sa Sitio Bagurot, Brgy. Mother Tuayan, Datu Hoffer Ampatuan, Maguindanao del Sur.
Sinabi sa DXMS Radyo Bida ni 601st Brigade Civil Military Operations o CMO Officer Major Saber Balogan na umabot ng isang oras bago natigil ang putukan.
Ayon kay Balogan, nagpapatrolya sa lugar ang kasapi ng 40IB nang makasagupa ang nasa 15 mga miyembro ng Dawlah Islamiyah Toraife Group.
Tatlo aniya sa panig ng teroristang grupo ang sugatan at wala namang iniulat na nasawi sa nasabing sagupaan.
Ang encounter site ay malayo sa mga siblyan ayon kay Balogan.
Sa ngayon nagpapatuloy ang hot pursuit operation ng militar laban sa nasabing grupo.