7 estudyante ng KNCHS na sangkot sa rambol, na-kickout
KORONADAL CITY - Kaagad inilipat sa ibang paaralan ng Koronadal National Comprehensive National High School (KNCHS) ang 7 mga estudyante na sangkot sa nangyaring rambol.
Inihayag ni KNCHS Principal Valentin Dignadice sa panayam ng Radyo Bida, na inilipat ang nasabing mga kabataan upang hindi na dumami ang kanilang mga miyembro na kabilang umano sa isang gang.
Hindi niya umano nais gamitin ang salitang "kickout" dahil hindi ito magandang pakinggan.
Layunin aniya nito na mabigyan sila ng pagkakataon na magbago, hindi maungkat ang kanilang nakaraan, at maputol ang koneksyon sa kanilang mga kasamahan na may masamang impluwensya sa kanila.
Ayon kay Dignadice, binigyan rin ang mga ito ng honorable dismissal upang makatulong sila sa pagbabago ng mga ito.
Apela na lamang nito sa mga magulang ng nasabing mga estudyante na huwag silang mainis sa kanilang aksyon dahil nais rin nilang mareporma ang ugali ng mga kabataan, ngunit mapipilitan silang protektahan ang mga inosente kung hindi pa rin sila magbabago.