COVID-19 cases in Kidapawan manageable, mayor says

KIDAPAWAN CITY - Manageable naman ang COVID-19 cases sa lungsod, yan ang pahayag ni City Mayor Joseph Evangelista nang tanungin kung pabor ba ito sa pag-lift ng Provincial Inter-Agency Task Force sa pagpapatupad ng General Community Quarantine sa lalawigan.

Nabatid na patuloy pang tumataas ang kaso ng COVID-19 infection sa Kidapawan City kung saan madalas na nakakapagtala ito ng double-digit number of cases sa nakaraang mga Linggo.

Paglilinaw ng Alkalde, kung pagbabasehan ang statistika sa kanilang data analyses, lumalabas na mataas ang natatalang kaso sa lungsod dahil sa delayed na report ng mga laboratories na nagpo-proseso ng RTPCR results.

Anya may mga pagkakataong namamatay nalang ang pasyente hindi pa lumabas ang resulta ng RTPCR result nito.

Ito ang dahilan kung kaya ay binigyang diin ng alkalde ang kahalagahan ng pagkakaroon ng sariling Molecular laboratory upang mabilis na makuha ang test results ng RT-PCR.

Umaasa naman ang alkalde na magagamit na ang ginagawang molecular laboratory sa lungsod bago pa man dumating ang buwan ng Nobyembre.

Maliban dito patuloy din ang konstruksyon ng mga dagdag na mga isolation facility sa lungsod ngayong may COVID-19 surge sa lalawigan.