Tripolante ng 2 pumpboat mula Zamboanga Sibugay, pinaputukan, pinatalon malapit sa Bongo island
Local News • 06:15 AM Tue Feb 6, 2024
391
By:
DXMS NDBC
Dalawa sa mga tripolante ng pumpboat na may dalang smuggled cigarettes. (shared photo)
NASA KUSTODIYA na ngayon ng Datu Blah Sinsuat PNP sa Maguindanao del Norte ang apat na kalalakihan matapos na pagbabarilin at inagawan ng kanilang sinasakyang mga pumpboat sa bahagi ng Bongo Island sa bayan ng Parang.
Dalawa sa kanila ay napadpad sa Barangay Pura, Datu Blah Sinsuat habang ang dalawa naman ay napunta sa karagatang sakop ng Barangay Tapian sa bayan naman Datu Odin Sinsuat.
Kinilala ni Datu Blah Sinsuat town police chief Captain Abdulbasit Kulod ang apat na sina Rasiden Asdali at TAwasil Jumadil, kapuwa taga Sulu, Yahya Hadjulani at Gajer Sampang, na parehong taga Recodo, Zamboanga City.
Sinabi ni Kulod na labing-isa umano silang lahat sakay ng dalawang pump boat mula Zamboanga Sibugay habang karga ang mga smuggled cigarettes.
Pero pagsapit sa Bongo Island ay pinagbabaril sila ng mga armadong kalalakihan sakay ng maliliit na bangka, tinangay ang kanilang mga kargamento at saka pinatalon sa dagat.
Hindi pa batid kung saan napadpad ang pito pang nilang mga kasamahan.
Nakatakda naman silang iuwi sa kani-kanilang mga bayan.