Retired cop patay sa pamamaril sa Koronadal City
Peace and Order • 15:30 PM Tue Feb 2, 2021
1
By:
NDBC NCA /DXOM-RADYO BIDA KORONADAL
KORONADAL CITY - Patay ang isang retired police officer matapos na siya ay pagbabarilin kaninang umaga sa likurang bahagi ng public market ng Koronadal.
Kinilala ni Koronadal PNP Chief Investigator Police Lieutenant Reynaldo Sotelo ang biktima na si ret. Master Sgt. Armondo Domingo, 59 na taong gulang, taga Purok Leganes, Barangay Zone 1.
Binaril ang biktima habang bumababa sa pampasaherong tricycle na sinakyan nito sa Zulueta St. Barangay Zone 1, malapit sa gate 4 ng palengke mga alas 11:00 kaninang umaga.
Ayon kay Sotelo maaring may kaugnayan sa trabaho ng biktimang retiradong pulis ang pagkakapatay sa kanya.
Gayunpaman, ayon kay Sotelo, nagpapatuloy pa ang malalimang imbestigasyon ng Koronadal PNP sa insidente.
Sinabi ni Sotelo na si Domingo na dati ring kasapi ng Koronadal PNP ay naitalaga pa sa South Cotabato Provincial Police office bago nagretiro dalawang taon na ang nakalipas.
Ipinahayag naman ng nakasaksi sa pamamaril sa Radyo Bida Koronadal na nakita mismo nito kung papaano binaril ng patalikod ng angkas ng motorsiklo ang biktima bago tumakas.
Ayon sa saksi ang driver ng motorsiklo ay naka-helmet habang naka-bonnet naman ang angkas nitong siyang bumaril sa biktima.
Ang biktimang si Domingo ay ideneklarang dead on arrival sa South Cotabato Provincial Hospital sanhi ng malubhang mga tama ng bala ng baril sa ulo at paa.
Narekober ng mga pulis sa crime scene ang limang mga basyo ng 45 pistol.
Nakaligtas naman matapos tumakbo mula sa crime scene ang driver ng sinakyang nitong tricyle.