Pagpupulong ng pamilya Sinsuat sa Cotabato City, nauwi sa barilan; police escort, patay
KINILALA ang nasawing police escort na si S/Sgt Zahraman Mustapha Diocolano, taga Dalican, Datu Odin Sinsuat, Maguindanao del Norte at nakatalaga sa Provincial Mobile Force Company ng Maguindanao Del Norte Provincial Police Office.
Ang biktima ay escort ni Datu Odin Sinsuat Mayor Datu Lester Sinsuat.
Ayon sa PNP, katatapos lamang ng pag-uusap ng nina Mayor Lester Sinsuat ng Datu Odin Sinsuat at pamilya ni Datu Jham Sinsuat sa bahay ni former Congressman Datu Roonie Sinsuat, nang biglang barilin ang escort ni Mayor Lester sa labas ng compound sa bahagi ng Rosales St., Rosary Heights 6 pasado alas dos ng hapon kanina.
Agad namang rumisponde ang PNP at Marines sa lugar at naaresto ang apat na mga suspek na sinasabing responsable sa pamamaril.
Kinilala ang mga ito na sina PFC John Carlo Bravo Nocum, kasapi ng 2nd Mechanized Battalion, Philippine Army at escort ni Datu Kim Sinsuat, Jholex Padsod Buludan, Datu Ali Ibrahim Mongkar at Roufden Angkad Ameril, na mga residente naman ng Datu Odin Sinsuat.
Sa ngayon ay blangko pa ang PNP kung bakit nauwi sa pamamaril ang sanay pagkakasundo ng nasabing pamilya.
Matatandaang nagkalamat ang pamilya matapos ang National at Local Elections noong 2022 kung saan nasawi sa pamamaril si Datu Jamael Sinsuat, Sr.