OFW mula Norala, South Cotabato, pinatay ng amo sa Kuwait

KORONADAL CITY - Sumisigaw ngayon ng hustisya ang mga kaanak ni Jeanelyn Villavende, 26 years old ng Barangay Tinago sa Norala, South Cotabato na isang Overseas Filipino Worker (OFW) matapos itong patayin ng kanyang babaeng amo sa Kuwait noong Dec. 30.

Pangarap lamang ng dalagang si Villavende na maiahon sa kahirapan ang kanyang pamilya at makatulong sa magsasakang ama kaya ito nangibang bansa noong Hulyo.

Ito ay ayon sa kanyang tiyahin at stepmother na nagpalaki sa kanya na si Nelly Padernal.

Pero ang mga pangarap na ito ayon kay Padernal ay biglang gumuho nang ipaalam mismo sa kanila ng isang taga Department of Foreign Affairs noong December 31 ang pagkamatay ng nasabing OFW.

Ito ay dahil umano sam pambubugbog ng kanyang amo.

Aminado si Padernal na nagalala na ito sa kalagayan ni Jeanelyn dahil hindi na nila ito gaanong nakakausap simula pa noong Oktobre.

Kung nakakausap man nila ito, ito ay sandali lamang at katabi pa umano ang kanyang among babae..

Ayon kay Padernal agad naman nila itong ipinaalam sa recruitment agency ni Jeanelyn sa Tacurong City , Sultan Kudarat na pinangangakuan lamang sila magbibigay ng update sa kalagayan nito.

Matapos ipagutos ni Pangulong Rodrigo Duterte bumisita na kahapon sa bahay mismo ng nasawing OFW sa Norala si OWWA Administrator Hanz Leo Cacdac na tiniyak ang tulong sa mga naulila ng biktima.

Ayon kay Padernal maliban sa tulong pangkabuhayan bibigyan din ng scholarship ang nakababatang kapatid ni Jeanelyn na pangarap nitong makapagtapos ng pagaaral.

Pero ayon kay Padernal hiling nila sa pamahalaan na mabigyan ng hustisya ang pagkamatay ni Jeanelyn na marami pa sanang mga pangarap para sa kanyang pamilya.

Ayon kay Padernal, agad na inaresto ng mga otoridad ang magasawa Kuwaiti na employer ni Jeanelyn sa ospital na kanilang pinagdalhan sa kanya.