Inabandonang smuggled cigarettes, narekober ng PNP sa Maguindanao Norte

SAMPUNG malalaking kahon na may lamang mga smuggled na sigarilyo ang narekober ng mga pulis sa Barangay Ungap, Sultan Kudarat, Maguindanao del Norte pasado alas 8:00 kagabi.

Ayon kay Sultan Kudarat Police Officer in Charge Captain Norman Nur, ang mga narekober na sigarilyo ay nagkakahalaga ng P180,000.

Ayon sa ulat, namataan ito ng isang concerned citizen sa madilim na bahagi ng nasabing barangay at agad ipinaalam sa mga otoridad.

Hindi pa batid ng PNP kung sino ang nag-iwan at kanino galing ang nasabing mga sigarilyo na may iba’t-ibang product brand.

Patuloy pa ngayong tinutugis ang mga suspek:

Sa ngayon ay nagpapatuloy pa rin ang anti-criminality checkpoint operations, police visibility at boarder control ng Sultan Kudarat PNP upang mapigilan ang pagpuslit ng mga iligal na produkto sa bayan.

Ang cigarette smuggling sa rehiyon ayon sa PNP ay hindi lang magpapahina sa mga legal businesses, kundi banta rin sa kalusugan ng publiko.

Mas pina-igting pa ng PNP at LGU sa Sultan Kudarat ang pagpapalakas ng kampanya kontra smuggling at iba pang iligal na aktibidad.

Pinapurihan din ng PNP ang mga mapagmatyag na mga concern citizen na malaking tulong sa pagpapanatili ng kaayusan sa bayan.