Dengue cases sa South Cotabato, bumaba
KORONADAL CITY - Tumalima sa “Operation Kulob” na isinusulong ng pamahalaang panlalawigan para mapigilan ang pagdami ng dengue cases sa South Cotabato.
Ito ang panawagan sa mga mamamayan ni Provincial Mosquito Borne Disease Coordinator Jose Barroquillo.
Ayon kay Barroquillo kahit mas mababa ang kaso ng dengue ngayon sa South Cotabato kumpara noong nakaraang taon hindi pa rin dapat maging kampante ang publiko.
Kaya hiling nito sa mga mamamayan maglaan ng kahit ilang minuto tuwing hapon para linisin o itaob ang anumang mga bagay na maaring pamahayan ng mga lamok na nagdadala ng dengue.
Ayon kay Barroquillo ito kasi ang pinakamadali at epektibong pamamaraan para mapuksa ang mga dengue carrying mosquito.
Tiniyak ni Barroquillo na tuloy pa rin ang kanilang mga programa kontra dengue kahit ngayong mayroong pandemic sa COVID-19.
Sa katunayan ayon kay Barroquillo prayoridad ng kanilang misting operation laban sa dengue fever ang mga isolation facilties para sa mga returning OFW at locally stranded individuals.
Ayon kay Barroquillo nakapagtala sila ng mahigit 500 kaso ng dengue sa South Cotabato mula Enero hanggang June 15.
Pinakamarami na 97 sa mga ito, ayon kay Barroquillo, ay naitala sa bayan ng Tantangan, sumunod ang Polomolok na may 96, Banga na may 87 at Koronadal City na may 85 dengue cases.
Pinakamaraming biktima ayon kay Barroquillo ay mga nasa zero hanggang ten years old.
Nakapagtala din ng tig iisang kaso ng nasawi dahil sa dengue ang mga bayan ng Banga, Polomolok at T’boli.