Antipas newly elected barangay kagawad patay sa pamamaril, pangalawa sa North Cotabato ngayong buwan
Local News • 10:30 AM Tue Nov 7, 2023
2
By:
NDBC NCA / Edwin Fernandez
Mga larawan mula sa social media sites at mula kay Cejay Palmes ng Antipas.
KIDAPAWAN CITY - Patay ang isang bagong halal lamang na barangay kagawad sa Antipas, North Cotabato matapos na pagbabarilin kaninang umaga sa boundary ng Barangay Dolores at Barangay Magsaysay.
Kinilala ng Antipas Municipal Police Station ang biktima na si Kagawad Edmar P. Perero ng Barangay Dolores.
Noong nakaraang Barangay at SK elections, si Perero ay nanalo bilang No. 2 kagawad ng barangay.
Siya ang pangalawang barangay kagawad na nanalo nitong nakalipas na eleksyon na binaril at napatay sa North Cotabato.
Ang pamamaril ay mahigpit na kinundina ng Antipas municipal police station.
Nagpapatuloy pa ang imbestigasyon ng Antipas PNP.
Noong Nov. 1, binaril at napatay ng kanyang pinsan si Kagawad Suharto Antilino ng Barangay Poblacion 3, Midsayap, North Cotabato.
Ayon kay Midsayap police chief Lt. Colonel John Miridel Calinga, bago ang pamamaril, nag-uusap si Antilino at ang kanyang di kinilalang pinsan sa gilid ng kalsada di kalayuan sa barangay hall.
Makalipas an gilang minuto, narinig ng mga saksi na nagsabi si Antilino sa wikang Maguindanaon na "huwag kang ganyan pinsan," sabay takbo pero hinabol siya ng suspect at pinaputukan.
Ayon kay Calinga, ito ay hindi isang kaso na may kaugnayan sa eleksyon kundi personal grudge. Nananatiling at large ang pinsan ng biktima.
