UPDATE: Negosyante, inagawan ng bag na may P80K cash at binaril sa Libungan, North Cotabato
Local News • 08:45 AM Mon Sep 11, 2023
262
By:
DXMS and John Felix Unson
Ang biktimang si Librea sa pagamutan. (Photo shared by Wow FM Midsayap to DXMS)
LIBUNGAN, North Cotabato - Sugatan ang isang negosyante matapos na barilin at agawan ng kanyang bag na naglalaman ng tinatayang higit sa P80,000 sa Barangay Cabpangi kagabi.
Naganap ang pamamaril alas 6:40 ng gabi sa harap ng bahay ng biktima. Kararating lang ni Juan Librea sa kanyang bahay sakay ng motorsiklo na minamaneho ni Jasper Boston nang agawin ng isa sa tatlong mga suspect ang kanyang bag, ayon kay Libungan town chief Major John Minidel Calinga.
Ayon sa report ng PNP, ayaw ibigay ng 57 taong gulang na si Librea ang kanyang sling bag kayat siya ay binaril sa dibdib.
Sinabi ni Calinga sa panayam ng DXMS na agad tumakas ang mga suspect matapos ang krimen sakay ng motorsiklo sa direksyon patungong Midsayap.
Dinala si Librea sa Mount of Blessing Hospital sa Libungan pero inilipat sa Community Health Service Cooperative Hospital (COHESCO) in Midsayap.
Nagpapatuloy pa ang imbestigasyon ng PNP.