Tampakan LGU, nagtatag ng honesty Store; gulay at pagkain may bayad
TAMPAKAN, South Cotabato - Kung nauso sa ibang lugar ang community pantry, ang lokal na pamahalaan ng Tampakan sa South Cotabato ay nagbukas naman kanina ng kanilang honesty store, gulay at pagkain nabibili sa murang halaga.
Mabibili sa honesty store sa tapat ng Sto. Niño Parish Church ang mga murang gulay at iba pang pangunahing pangangailangan. Walang tindera na nagbabantay at wala ding CCTV camera.
Ang mga ito ay inangkat mismo ng lokal na pamahalaan sa mga magsasaka sa lugar.
Ayon kay Tampakan Mayor Leonard Escobillo, nagtatag sila ng honesty store para makatulong sa mga mamamayan na labis na naapektuhan ng pandemya.
Ipinahayag din ni Escobillo na ang pondong malilikom mula sa honesty store ay gagamitin din sa pagangkat ng mga paninda para dito.
Palala naman ng lokal na pamahalaan sa mga tumatangkilik sa kanilang honesty store, bumili lamang ng naayon sa pangangailangan at huwag kaligtaan na ilagay sa kahon ang kanilang bayad.
Tiniyak din ni Escobillo ang mariing pagpapatupad ng minimum health protocol sa honesty store.