Sunog sa Koronadal, apat na bahay natupok
KORONADAL CITY - Nagpapatuloy ang imbestigasyon ng Bureau of Fire Protection Koronadal kaugnay sa nangyaring sunog na naganap sa Odi corner Morrow St, Prk. Silangan, Brgy. Zone 2 nitong lungsod alas pasado 2 kaninang hapon.
Batay sa inisyal na imbestigasyon, nagsimula umano ang sunog sa ikalawang palapag ng pamilya Villaruz kung saan apat na bahay ang nilamon ng apoy.
Apektado rin sa naturang sunog ang pamilya Cañete, Pama, at Duplito.
Ayon kay tatay Rudy Pama, bigla na lamang umanong sumiklab ang apoy nang papalabas na ito sa kaniyang bahay.
Nagtulong-tulong naman ang mga firetrucks ng BFP-Koronadal, BFP-12 at KCC Fire Volunteers hanggang sa tuluyang na-kontrol ang apoy.
Samantala, nasa ligtas nang kalagayan ang isang batang may diperensiya umano sa pag-iisip matapos na-report na nawawala sa kalagitnaan ng sunog.
Personal namang bumisita si Koronadal Mayor Eliordo Ogena sa mga nasunogan at tiniyak ang karampatang ayuda para sa mga ito.
Sa ngayon ay inaalam pa ng BFP ang kabuuang pinsala ng sunog at ang pinagmulan nito.