Bata patay makaraang makuryente sa Norala, South Cotabato

NORALA, SOUTH COTABATO - Nagdadalamhati ngayon ang pamilya ng isang menor de edad matapos makuryente sa Barangay Matapol sa bayang ito.

Kinilala ang nasawing biktima na si Joshua Alvarez, 16 taong gulang, estudyante at residente ng Brgy. Matapol ng nasabing bayan.

Sa panayam ng Radyo Bida sa ina nitong si alyas Bebeng, sinabi niya na pasado ala-1 ng madaling araw nang pauwi na galing umano sa discohan si Alvarez kasama ang kaniyang dalawang barkada sakay ng motorsiklo ngunit nadulas sila dahil sa ulan kaya minabuti nilang maglakad na lang.

Aksidente namang natapakan at nagkabuhol-buhol sa paa ni Bonbon ang live wire sa daan mula sa bakod ng bahay ni Marlow Bulanos kaya't natumba ito habang nakukuryente.

Nagpanic naman ang mga kasama nito sa pagligtas sa kaniya kung saan isinugod siya ng kaniyang pamilya at kaibigan sa Norala District Hospital, ngunit idineklarang dead on arrival ng attending physician.

Ayon naman kay Bulanos, ginawa niya ang de-kuryenteng bakod dahil minsan na siyang ninakawan ng kaniyang mga alagang hayop.

Hindi rin umano niya ninais ang pangyayari at nais niya lang mapangalagaan ang mga kahayupan nito.

Ganunpaman, desidido ang pamilya ni Bonbon na sampahan ito ng kaso kung saan murder ang kakaharapin nito.