2 sugatan sa pagsabog ng pinaniniwalaang granada sa Pikit
Peace and Order • 17:45 PM Fri Oct 7, 2022
614
By:
DXND Radyo Bida with reports from John Unson
Photo courtesy of Abby Regulacion
KIDAPAWAN CITY - Dalawang lalaki ang sugatan sa tila walang tigil na karahasan sa Pikit, North Cotabato.
Ngayong hapon, isang pinaniniwalaang granada ang sumabog di kalayuan sa Cruzado clinic sa Poblacion Pikit na ikinasugat ng dalawang lalaki, kabilang ang isang senior citizen.
Ang larawan sa ibaba ay lugar malapit sa pinagsabugan ng pinaniniwalaang granada at ang isa sa mga biktima.
Sinabi ni Pikit town police chief Maj. Maxim Peralta sa panayam ng DXND Radyo Bida Kidapawan na isinasagawa pa ang imbestigasyon sa naganap na pagsabog pasado alas dos ng hapon.
Kinilala ni Maj. Peralta ang mga biktima na sina Pangatong Abdulraud Mustapha, 29 years old na residente ng Barangay Lagunde at Reformido Regulacion, 64 anyos na residente ng Barangay Poblacion, Pikit, Cotabato.
Sa impormasyon mula sa mga biktima, sila ay nasa motorshop nang mga sandaling iyon nang biglang may naghagis ng granada na siyang dahilan ng kanilang pagkakasugat.
Sa imbestigasyon, lumabas na ang sumabog ay isang MK2 fragmentation grenade.
Agad namang tumakas ang mga suspect sakay ng motor.
Patuloy ang imbestigasyon ng mga otoridad.
Kaninang umaga, sugatan ang dating CAFGU na nakilalang si Rodolfo Gornez, 74 na taong gulang. Sakay siya ng motor at bumibiyahe sa provincial road ng Barangay Manaulanan nang basta na lang paputukan ng mga suspect na sakay ng hiwalay na motor.
Si Gornez na nagtamo ng minor injuries ay dinala sa Cruzado medical clinic habang ang driver nito nA si Abdul Salim Garica ay nakaligtas.